Col 2 | GbrGAW | STEP | Awomilo ngye fye kpe shi mi sunkun lo, mi-i zhin aduwa ga fye ɓedo ikklisiya yi n kwo nyi n Lawudikiya nyi, n mi anugundo yi n ɓa ta shin mi ye kpe lon.

Colossians 2

1 Awomilo ngye fye kpe shi mi sunkun lo, mi-i zhin aduwa ga fye ɓedo ikklisiya yi n kwo nyi n Lawudikiya nyi, n mi anugundo yi n ɓa ta shin mi ye kpe lon. 2 Nya nyi n mi nya Shekwoyi ntu fye ɓo, fya bwa kala fya nyimaje dna n ye-ye, fya kpe Kristi ye dei-dei, n tna wyegma. Gama Shekwoyi shiri asiri, n na ala guya wuyi nyi, okwo nu zhin Kristi n wohin tukwo yi. 3 Dna n wo nu a ɓeyekpe n cece yakwo yi sofi.

4 Mi da deye ntu ge mi wo dna kada zaho wa ɓe fye aba n ɓeda dadayi, wa dna fye kwoce.

Fye To Ye A Wun Fye Gaiciya Yam

5 Gama ko mi lo n kpai n fyei, omi bugba kunsun lo n fyei, ai dami ntu fye gaiciya ga kalada ɓo dna n Kristi. 6 Nsaiye shi fya kpema Kristi wa gnifye nyi, fye kpema wo lonu fyegyi-fyegyi, fyei nyima wo cici. 7 Fye fa efye agbegye ɓa mifi n wo, fya bwa nyagyi zafunya nwo. Fye gyi abye n mwa-mwa yi dna n Dagayi, fya ku dna kala n mizhi n gaiciya, n na ɓei wu fye nyi. Ofye awye-wyeyi ɓa nu na gmadayi n godiyayi ntu n nya ɓo n wo ku zhin.

8 Fyeto fa aza ɓa wunfye gaiciya ga ya n ye-ye yin, n na anyi ɓeyekpe yin, oɓa amsa nukwoyi, akpe-kpe gyei n na mi ɓa kpe n aza ɓeyekpe na ɓo mwi yi, mai-makon nya n Kristi wa da. 9 Gama dna Kristi Shekwoyi wa wu wohin tukwo dna n nayi. 10 Ntu cenu fye n na anya yi lo vinya n dei fye n Kristi yi lo, ai ku fye nu n Shekwoyi ntu n fye gmanyi ze ɓo n Kristiyi. O wo nu zhin Begyi yi dnagmayi ndu zaho-zahoi n wo n ikoyi.

11 Sanu n fya ɓe Kristi aba wa lo fyeya n fye ashakpe nukwoyi to ge n kaciya zhin ɓon, ama dna n zafun Baptisma ofya wye-wyeyi nya. 12 Gama dna n baptisma fye gye shi efya anayi akwo-kwoyi, anukwoyi ɓo ku fi n gnisun woi, aku fye bi n gnisun n woi, fya kun n ʼfi n woi, dna n wye-wyeyi woi-woyi ntu ge fye ɓei ga Shekwoyi ikoda ɓeda gaiciya n wo ɓei la Kristi kala n ʼfi nyi.

13 Fye ɓei ku fi fi n fye alaifi, ato ɓei zun fye a shakpe a laifi nya yan. Wa ga fye aba dna n Kristi wye wyeyi gama wo ɓei ku fye zhin gafara. 14 Wa zo of ye knizun vinya, owo awyidna vinya nfye to ɓei shi ɓa bwa nyin. Wa ku alaifi ye vinya wa zunɓadu tu n Kristi zundu. 15 Dna n zokwoye nu n Shekwoyi ɓei wun Shetan ikoya, n wo zan fye laifi zanyi nyi, Shekwoyi wa wu anyi vinya pei-pei Kristi nasara tu n zundu, aba n na aɓei lo n fye alaifi yi nyi.

16 Ntucenu fye to fa oza wa zan-fye laifi zanyi ntu n na anya ɓo n fye gyi ko nfye sin. Ko ntu ge fye ta shi a Yahudiyi anyipyei agyi-gyi yi bwa lon, ko epya woi ko asabar woyi m. 17 Gama adeye ɓei zhin awyidna ntu n esa fyewyi ɓonu, n ɓa ɓei zo esa n Kristi ɓei ɓe n cei nyi. Ɓa ɓei zhin ofun ɓehin-hin nyanu. N kwo ɓe lo, wato, Kristi n wohin tukwo. 18 Fye to ye zaho-zahoi wa ci fye ge fye ku bwi, ntu ge fye ta zhin a malaika sujada lon. Shi ɓa gna fye ge tilas fya zhin nyin, ɓai gna ge ɓaku gye ruya ɓai kpela nge ko kuncelo fya gye. Aza tukwo mwayi (koda yake ɓa gna nge ɓata mwa ɓahin tukwon.) Ɓa ce-ceyi lo dna n ɓa aɓemwi. 19 Ama ɓato ɓedolo n Kristi yin, tukwo n yi zhin okwo nayi nyin, gama yifi n wo nayi nu yi mwa, yi bwa nyagyi n kalayi n Shekwoyi aba.

20 Shi fye ku fi, n Kristiyi, deye la fye loya n anyi ɓemwi ngye shi oza ɓo pwo nwu, dna n ɓemana zhin n na wyidna bwashi-kninu zhin fye ye viɓa n pa payi n na awyidna yi ge, 21 to gyin, to towon, harma nge ato to anya gyiho pya bwan ma? 22 Aɓo kni ye pya ɓa zhin aza ɓowu nu kawai, ntuge aɓei zhin nya gyi agyi nu a zhin apma n cei. 23 Aɓo kni ye wulo ngye ɓa bmiya, gama aɓokni ye pya ye n na aɓo bwashi n kala yinu, ndna ɓo, ɓai ga ɓa nayi wahala. Ama ɓato n kalai ɓa gyi nasara tu n oza a nubo zhin n na shakpe nukwoyin. Ɓa bwa oza zhin wa zhin aɓokwo nu.